logo

Шымкент: Бюджетті жоспарлауда кемшіліктерге жол берген тұлғаларға қатаң шара көріледі

Таңдаулы Шымкент: Бюджетті жоспарлауда кемшіліктерге жол берген тұлғаларға қатаң шара көріледі
  • Бөлім:  Саясат
  • Оқылды 157 рет

Шымкент қаласының әкімі Ерлан Айтахановтың төрағалығымен бюджеттік тәртіпті күшейту, оның атқарылуын жүйелеу және бюджетті жоспарлаудың тиімділігін арттыру мәселелеріне арналған жиын өтті. Бұл туралы қала әкімінің баспасөз қызметі хабарлады.

Қала басшысы жергілікті атқарушы мемлекеттік органдардың бюджетті жоспарлаудағы кемшіліктерін сынға алып, орындаушылық тәртіптің өте төмен, сын көтермес деңгейде қалғандығын ашып айтты.

Атап айтқанда, Шымкент қаласы әкімдігінің салалық басқармаларында бюджеттік тәртіп талаптарының орындалмауы салдарынан бірқатар жобалардың іске асырылу мерзімі кейінге шегерілмек.

Мәселен, биылғы жылға арналған бюджеттің атқарылуы барысында республикалық бюджеттен бөлінген қаражаттың 6458,2 млн. теңгесі ақтауға келмейтін себептермен қысқартуға ұсынылған. Оның ішінде 5052 млн. теңге көлеміндегі қаражат бюджет әкімшісі болып табылатын басқармалар тарапынан мемлекеттік сатып алу конкурстарын мерзімінен шектен тыс кеш өткізуі салдарынан қысқартылып отыр.

Басқарма басшыларының өздеріне жүктелген міндеттерді дұрыс атқармауы, қаржылық жоспарлауды талапқа сай жүргізбеуі, қала әкімінің салалық орынбасары тарапынан тиісті бақылаудың болмағандығы салдарынан мемлекеттік сатып алу конкурстары жыл ортасына дейін созылған.

Жұмыстың тиімді бағыттары белгіленбеуі, салалық басқарма тарапынан қолға алынған жобалардың қадағалаудың жоқтығынан жүйелі іске асырылмауы, шаһардың солтүстік-батыс бөлігіне жүргізілуі тиіс инженерлік-инфрақұрылымдарды дамыту жобасына қаралған барлығы 1 116,9 млн. теңгенің 522 млн. теңгесі қысқартуға жолданған. Оған басты себеп – 16 кредитті тұрғын үйдің құрылысын 2020 жылы аяқтау жоспарланған. Яғни, бюджеттік жоспар жыл басында дұрыс түзілмеген.

Кері қайтуы тиіс республикалық қаражат есебінде Шымкент қаласының білім саласы бойынша 2410,1 млн. теңге қысқартуға ұсынылған. Оның да басты себебі – мемлекеттік сатып алу конкурстарының мерзімінен кеш өтуі. Салалық басқарманың салғырттығынан қаладағы №23 мектеп қосымша ғимаратсыз қалса, «Асар-2» шағынауданының тұрғындары 1200 орындық жаңа мектептен қағылды.Бұл жобаларды жүзеге асыру мерзімдері кейінге шегерілмек.

Осы және өзге де бюджеттік сала түйткілдерін сынаған қала басшысы, бұдан былай бюджеттік өтінімге енген әрбір жоба бойынша басқарма басшылары жеке-дара жауап беретінін айтып, қала әкімінің салалық орынбасарына бюджетті орындау тәртібін жеке бақылауына алуды тапсырды.

Бюджеттен бөлінген әрбір тиынға жауапкершілікті арттыру, қаржының мақсатты жұмсалуын қамтамасыз ету, бюджеттік жоспарлаудың тәртібі мен мазмұнын қатаң ұстану бағытында әр басқарманың жанынан бюджет жоспарлаудың, оны тиімді игерудің тәртіптерін меңгерген білікті мамандардан құралған кеңес құруды жүктеді. Саладағы бюджет тәртібін айналдырған бір-екі лауазымды тұлға емес, сол салаға қатысты барлық проблемаларды жақсы білетін қоғам өкілдері жұмылдырылуы тиіс екендігіне назар аударды.

Жиынды қорытындылаған қала әкімі әрбір мемлекеттік орган басшысы өзіне жүктелген басты міндеттер ретінде – бюджетті дұрыс жоспарлай білуді, мемлекет қаражатын үнеммен тиімді жұмсауды және бюджеттің жауапкершілігін жетік сезінуі тиіс екендігіне назар аударып, жыл қорытындысында бюджет саласындағы

кемшіліктерге жол берген лауазымды тұлғаларға қатаң шара көрілетіндігін ескертті.